有個朋友最近加咗人工，阿史梗係即刻恭喜佢，點知佢就唔多高興，「加得果雞碎咁多，都唔夠搭車。」

所謂「雞碎咁多」，係用嚟形容事物嘅數量好少。其實「雞碎」正寫為「雞膆」或者「雞嗉」，「膆」讀做碎或者素。據《爾雅•釋鳥》，「雞膆」即係指鳥類喉嚨下面暫時用嚟裝食物嘅器官。《本草綱目》嘅作者李時珍都有解釋呢個部位，話：「吐綬雞項有嗉囊，內藏肉綬。」由於「雞膆」實在太細，裝到嘅食物非常有限，所以就被人用嚟形容某樣嘢好少咁解。

原圖嚟自網絡。