歷史上對漢高帝劉邦嘅評價有好有唔好，好嘅係佢懂得廣納人才、知人善任，唔好嘅就係佢後生果陣放蕩不羈、鄙視儒生等，十足十一個不學無術嘅爛仔咁，咁究竟佢係點樣由一個平民搖身一變，成功坐上皇位嘅呢？

話說劉邦細細個已經係個無賴，又懶散又曳，鄉親鄰里都鄙視佢，就連父親都睇唔起佢，成日拎佢嚟同佢細佬比較。唔單止咁，劉邦自己唔鍾意讀書都算，佢仲就好憎讀書人，《史記·酈生陸賈列傳》曾經記載，劉邦見到啲儒生除帽之後，居然喺人哋頂帽度屙尿，真係無品到爆。不過劉邦好好彩，喺泗水擔任亭長嘅時候，受到當地豪族呂公嘅賞識，仲將女兒呂雉下嫁俾劉邦，呢個就係日後嘅呂后喇。

話說秦始皇駕崩之後，秦二世耽於享樂，聽信宦官趙高讒言，搞到秦國上下怨聲載道。亂世之下，劉邦自號沛公，趁亂起義，最後推翻秦朝。之後項羽自立為西楚霸王，一攻入咸陽就大肆燒殺搶掠，仲將劉邦分封去巴蜀，所作所為大失民心，亦加劇咗佢同劉邦之間嘅矛盾。而劉邦做咗漢王之後，以漢中為基地，期間養民招賢，安定巴蜀，之後於楚漢之爭中大敗項羽。項羽最終喺烏江自刎，劉邦建立漢朝，成為漢高祖。

圖為《楚漢驕雄》劇照，原圖嚟自網絡。