對於土耳其呢個响亞洲同歐洲之間嘅國家，香港人應該唔會太陌生，因為土耳其係唔少港人會去個度旅遊，另一方面土耳其嘅足球都好出名。其實，土耳其同中國史書上一個外族名字可能有淵源，就係突厥。

提起突厥，讀過中史嘅史友都知係古時一個不時入侵中土嘅遊牧民族，《北史》記載「突厥者，其先居西海之右，獨為部落，蓋匈奴之別種也。另一說出自平涼雜胡。又曰突厥之先，出於索國，在匈奴之北。」响六世紀，突厥响建立咗個汗國，位置大概响依家蒙古北部至貝加爾湖，西至裏海一帶。响南北朝、隋朝同唐朝都經常同中原政權發生軍事衝突。另一方面，突厥汗國後嚟又分裂成為東突厥同西突厥兩個汗國，而唐朝就先後對東西突厥用兵，消滅咗呢兩個外患。

好喇！响西突厥被滅之後，部分突厥人就開始西遷，愈走愈遠，而且仲不斷同各外族融合，當中就有一支叫烏古斯族，呢個族响中世紀時期响中亞同中東一帶先後建立唔同嘅政權。依家嘅土耳其人，都認為自己袓先係源於烏古斯人，烏古斯又係昔日中亞突厥嘅一支，所以佢哋就話係古代突厥嘅後裔喇！之不過，呢個講法亦有人質疑，有學者就認為烏古斯人响中世紀最初只係被突厥人臣服嘅民族，只能算係廣義上嘅突厥人，而非擁有正宗嘅突厥人血統。

其實，除咗土耳其，阿塞拜疆、哈薩克、吉爾吉斯等國家都係突厥語族國家，呢幾個國家仲响2009年組成突厥語國家合作委員會，簡稱突厥議會，形成同阿拉伯聯盟類似，通過「議會」加強突厥語國家之間嘅合作。所以，响講「一帶一路」同中亞中東等國家時，亦要對此有所關注。