繼續同史友們介紹世界各地嘅新奇考古發現，世界各地奇形怪狀嘅石雕可能大家都見過唔少，但近日土耳其公布嘅呢個「另類」浮雕，就連考古專家都一頭霧水，阿史今次就同大家講一講啦！
其實早喺2021年，土耳其東南部烏爾法省（Urfa）就有一處新石器時代遺址出土。整體石雕就高70至90厘米，闊3.7米，成品嘅年代大概就喺公元前9000年前後，主要就由兩個場景組成。喺浮雕嘅左方就有一隻犄角巨大嘅公牛向男衝去，而男子就一手握蛇，喺腹下位置嘅重要部位就雕刻得異常龐大；至於另一部分嘅男子就被兩隻豹包圍，而佢雙手就係緊握住自己嘅重要部位，表情就係相當緊張。亦都係因為有咁奇怪嘅動作以及細緻嘅表情，更加令到考古專家唔明白當中到底有何深意。
呢次考古發現雖然係好奇特，但始終都係一次重要嘅史料去幫助考古專家了解社會過渡至更穩定生活形式時，人類與自然環境及周遭動物間嘅複雜關係。
原圖嚟自網絡