尋日講開漢高祖劉邦，今日順手講埋佢嘅髮妻呂雉。呂雉係豪族呂公嘅女，喺劉邦未做皇帝時，兩個人就結咗婚。提起呂雉，最出名嘅梗係佢將眼中釘做成人彘嘅恐怖事蹟喇，究竟點解呂雉會由賢內助變成心狠手辣嘅毒婦人呢？

根據《史記•呂太后本紀》所載，劉邦做咗漢王之後，娶咗定陶嘅戚姬，對佢寵愛有加，仲想將佢生嘅仔如意改立為太子。戚姬受寵，經常陪劉邦去關東，而呂后因為年紀比較大，成日留喺屋企，好少見到劉邦，兩個人慢慢疏遠。戚姬恃住自己受寵，成日喺劉邦面前喊苦喊忽，想自己個仔取代太子。而如意被封為趙隱王之後，有好幾次都威脅到太子嘅地位，多得留侯張良嘅計謀，太子嘅地位先得以保留，咁樣一嚟，搞到呂后憎戚姬兩母子入骨。後嚟劉邦駕崩，呂后嘅仔劉盈做咗皇帝，號孝惠帝，而如意就被封為趙王。

劉邦一死，呂后再無顧忌，先將戚姬囚禁，再召趙王入京，諗住將兩母子一齊誅殺。點知中途殺出個趙國丞相周昌，話劉邦將趙王託付俾佢，佢唔能夠眼白白睇住趙王死，仲話趙王有病唔入京。呂后好嬲，索性連埋周昌一齊齊召入京。仁慈嘅惠帝知道阿媽手段多多，所以親自接趙王入宮，仲同趙王同食同住，搞到呂后無機會落手。終於有一個朝早，惠帝早起出咗去射箭，得返趙王獨處，呂后即刻派人拎毒酒俾趙王飲。等到惠帝返嚟，趙王一早就斷咗氣。

趙王死後，呂后跟住就派人砍斷戚姬嘅手腳、挖咗佢對眼、整聾佢仲灌埋啞藥，丟去豬欄，整成人彘，仲叫埋惠帝去睇，惠帝睇完之後大喊，之後足足病咗成年。面對咁殘忍嘅嘢，惠帝都幫親生阿媽唔落，派人同呂后講：「呢啲簡直唔係人做嘅嘢，我作為太后嘅仔，再唔能夠治理天下。」從此以後，惠帝每日飲酒作樂，不問朝政。

原圖嚟自網絡。