相信大家對金庸嘅《鹿鼎記》耳熟能詳，入面武功高強，仲教韋小寶武功嘅獨臂神尼，係明朝末代皇帝崇禎嘅女兒。歷史上，崇禎真係有一個獨臂嘅女，只不過佢既唔識武功，亦無做到尼姑，佢就係長平公主。

睇返《明史•公主傳》，長平公主喺16歲之前仲係個無憂無慮嘅公主，崇禎仲幫佢定好婚事。點知長平公主同準駙馬、都尉周世顯即將成婚之際，闖王李自成就攻到北京。眼見大勢已去，崇禎先叫周皇后自縊殉國，又砍死昭仁公主同唔少妃嬪，輪到長平公主，崇禎只係講咗句「汝何故生我家」，就用劍砍咗長平公主嘅左臂落嚟，自己亦都自盡而亡。

長平公主無咗隻手，昏迷咗幾日就醒返，後嚟清兵入關，佢被當做前朝遺族禮待。不過，長平公主經歷國破家亡，早就有出家嘅念頭。而啱啱入關嘅順治為咗鞏固政權，梗唔俾長平公主如願，仲重新為公主同周世顯賜婚，賞賜土地、府邸、車馬、金錢等俾長平公主，做足公主大婚禮數，夠晒派頭。但長平公主始終心有鬱結，成婚第二年就病逝，最後以公主規格被厚葬喺廣寧門外。

圖為《帝女花》及《鹿鼎記》劇照，原圖嚟自網絡。