喺1922年3月4日，香港發生「沙田慘案」，有五個手無寸鐵嘅工人被港英軍警開槍打死。而呢宗慘案嘅發生，其實係同海員大罷工有密切嘅關係。

喺早期，香港嘅中國海員長期受到資方剝削，同白人海員同工不同酬，而且仲會成日被人打罵、刻扣工資。喺1922年1月，有海員工會向資方提出加人工被拒，於是就發起大罷工。港英政府大為緊張，用武力封咗工會，拉咗啲罷工領袖，激發起包括飲食、渡輪、銀行等唔同行業嘅工人罷工，最高峰嘅時候參與人數高達十幾萬，令香港交通中斷，百業停滯。

罷工期間有唔少工人離港，於是港英政府就喺2月尾下令九廣鐵路停駛，但依然阻止唔到啲工人「行路上廣州」。喺3月4日，一批工人行經沙田嘅時候，有軍警開槍阻止，導致五死七傷，事件被稱為沙田慘案。沙田慘案引起廣大華人憤怒，令工潮進一步蔓延，最終資方同港英政府都要屈服，資方同意加薪，而港英政府就解封工會、釋放被捕人士同向慘案受害者發放撫恤金，令工潮落幕。

原圖為當年3月群眾於中環德輔道中聚集，圖片來源：工聯會。