上次講開點解金鐘英文名會係Admiralty，諗諗吓香港都有唔少地方名嘅中英文名係大纜都扯唔埋，就好似屯門青山咁，英文居然叫Castle Peak，到底個名係點嚟呢？

據講，係因為英國人東來之時，覺得青山山頂似堡壘，所以就將青山命名為Castle Peak，意思係堡壘山。其實早喺1810年，即係仲早過香港開埠，當時嘅孟買海軍上慰鄧尼斯‧羅斯同菲力浦‧莫姆為東印度公司繪製海圖，已經標註青山做Castle Peak，有學者相信係同青山頂峰多奇巖怪石有關，不過似唔似就真係見仁見智喇。

原圖取自網絡。