呢排阿史搭車返工，都會見到各政黨立法會候選人派傳單叫街坊們投自己一票。阿史諗諗下，就諗返起以前英國殖民統治香港個陣，唔單止好後期先有民選議員入立法局，甚至華人做立法局議員响好長時間為數都唔多。兩年前阿史就介紹過第一個華人議員伍廷芳，今次借啲意就想介紹下第二位華人議員黃勝。

黃勝呢個名字對史友們而言可能會較為陌生，但响十九世紀嘅香港，佢絕對係華人社會中地位舉足輕重嘅人物。黃勝原名黃達權，小名叫勝，早年响馬禮遜紀念學校，後嚟去咗美國留學，後嚟佢返香港之後，從事翻譯工作，成為香港首位獲認可嘅華人陪審員。除咗係首位華人陪審員外，佢仲响1883年獲時任港督寶雲委任為為非官守太平紳士，响當時嘅香港可以話相當厲害。

阿史對於黃勝嘅認識，其實係响讀香港出版業歷史個陣。因為黃勝曾經參與香港早期幾份中文報章《遐爾貫珍》、《循環日報》同《華字日報》，佢都有份參與。另外，佢亦同晚清時期嘅思想家王韜一齊創辦中華印務總局，响另一個角度睇，佢兩個响當時都係變法改革嘅倡議者。所以，黃勝响十九世紀對推動華文文化係佔咗一個重要地位。

黃勝作為當時華人領袖，中文又得英文又好，又留過學，仲要係教徒，殖民地政府會搵佢幫手就自然不過，所以委任佢出現多個公職喇！