前幾日boss唔係度，有同事早咗少少走，臨走前都要寸仲做緊嘢嘅同事話：「行得快好世界，走得摩無鼻哥。」阿史除咗話佢勁幼稚之外，都唔知可以講咩好。

話說點解呢個「摩」字係解慢、遲嘅意思呢？阿史翻查返古籍，「摩」嘅其中一個意思係迫切、快咁解，例如《廣韻》「摩，迫也」、《禮記•樂記》注曰：「摩，猶迫也。」其中，呢個「迫」又有快、急切嘅意思。可見，以前嘅「摩」同「慢」嘅意思幾乎相反。至於點解「摩」解做遲、慢，原嚟同訓詁學入面嘅反訓有關，反訓簡單啲嚟講，就係講反話，就好似《方言》裡面提到嘅「以臭為香、治為亂」嘅例子一樣，「摩」係取其相反嘅意思嚟解。

不過，阿史點都諗唔通嘅係，點解「走得摩」會無鼻哥？係純粹為押韻抑或另有其他意思？

圖為《哈利波特》劇照，原圖嚟自網絡。