唔知史友有無去過中環PMQ元創方呢？話說，元創方前身其實係皇仁書院舊址同埋係荷李活道警察宿舍，今次就簡單講吓皇仁書院嘅歷史。

皇仁書院原名叫中央書院，最初位於歌賦街44號，响於1862年創立，係香港首間由殖民地政府開辦同全額資助嘅學校，有唔少著名歷史人物都曾經喺中央書院讀書，好似國父孫中山、何東爵士、首位華人西醫何啟爵士、「香港大老」周壽臣、中華民國首任總理唐紹儀等等。到咗1889年，由於學生人數眾多，中央書院就搬去附近荷里活道嘅新校舍，亦即係PMQ嗰度，並改名做維多利亞書院。喺1894年，學校再改名叫皇仁書院，富商霍英東、澳門大亨何鴻燊亦曾經喺荷里活道校舍讀過書。

經歷第二次世界大戰洗禮後，荷里活道校舍受到嚴重破壞，1950年皇仁書院再搬到去到而家維園對面高士威道校址，荷里活道校舍就被改建成兩座已婚警察宿舍同少年警訊會所。

原圖取自網絡。