有「詩佛」之稱嘅唐代詩人王維，佢嘅作品一向俾到人一種隱士生活、詩畫合一嘅感覺，加上佢後期信佛，更加令佢嘅詩多咗啲禪意。不過，其實王維後生果陣都係個「勇於求職」嘅青年，憑住一疊寫到誇啦啦嘅詩歌，以及一手好琵琶，成功獲得公主青睞。

唐代薛用弱嘅小說《集異記》同《唐才子傳》就記載咗王維呢個小故事。話說丞相張九齡嘅細佬張九皋成為京兆府解頭嘅呼聲非常高，點解？據傳係有公主舉薦佢。不過王維都想應薦呢個位，但苦於無人舉薦，於是就搵咗佢朋友岐王李范幫手。李范心生一計，特登為王維舉辦咗一場宴會，邀請咗唔少名流到場，當中就包括地位顯赫嘅玉真公主。

宴會一開，估計王維應該生得唔錯，玉真公主喺人群裡面一眼就見到佢，仲問李范佢係邊個。李范專登賣關子，話王維係「知音者也」。玉真公主就更加好奇王維嘅身份喇，命佢獨奏一曲。王維當場就用琵琶演奏，樂聲悠揚帶啲哀切，聽到滿座動容，公主更加聽到淚流滿面，問王維呢首曲叫咩名。王維就話係自己新作嘅曲，叫《鬱輪袍》。依首曲有幾勁？後嚟雜劇、傳奇、戲曲都用佢不斷演繹，就知係真材實料。

講返正題，李范見公主被打動，趁機話王維除咗彈琵琶叻之外，詩文都係一絕，跟手就奉上王維嘅詩作俾公主睇。公主睇完之後超驚訝，「呢啲咪就係我平時睇開嘅詩？我仲以為係古人寫嘅添，原來竟然係你寫嘅。」王維得公主賞識，即刻被奉為上賓，至於京兆府解頭呢個位，就梗係如願以償咁袋入袋喇。

圖為元朝畫家王蒙嘅《仿王維輞川圖》（局部）圖及王維畫象，原圖嚟自網絡。 

資料來源：金羊網