阿史之前都介紹幾次《山海經》同當中記載嘅各種古怪生物同怪獸，而有古代史學者就提及過，《山海經》嘅內容其實係歷朝歷代不斷改編同增加，依家後世見到嘅版本其實係响明代嘅版本。至於古代所流傳嘅妖怪，好多都係响唐代先出現。
講到唐代書籍所載嘅妖怪可以話係五花八門。各種動物，植物甚至死物都能被時人刻畫為妖怪，亦因為咁响唐以前記載嘅妖怪種類原來只有二三十種，唐代以後就增加到上百種。點解會咁呢？其中一個講法係話唐代中外交通交流頻繁，好多外來宗教同外族信仰傳入中原，大大豐富咗呢方面嘅內容。另一方面，中原人見多咗外來物種，响知啲唔知啲情況下又令到唔少妖怪「出現」，某程度上可以話係當時人一種科學觀。
有趣嘅係，响唐代或以後出現嘅妖怪，通常係凶神惡煞無乜人性，其中一個原因就係時人受部分宗教價值觀影響，描寫心惡一定係醜陋，形成一種懲惡揚善嘅觀念。
原圖嚟自網絡