二戰之後，香港對勞動力需求增加，於是港英政府對偷渡客嘅處理比較寬鬆。喺1974年，政府實施「抵壘政策（Touch Base Policy）」，容許成功偷渡到九龍界限街以南市區嘅偷渡客，去入境處登記成為香港居民，但如果中途被警方捉到，就會被遣返內地，情況就好似打棒球比賽咁，球員只要及時抵壘，就唔駛出局。香港傳媒曾經提過，夏雨等藝人都係當時嚟到香港。

曾經有退休警察話，當年平均每日都會捉到大約200個偷渡客，有啲偷渡客喺鯊魚涌、大小梅沙嗰邊游水過嚟，有唔少人中途被鯊魚咬死，亦遇過一艘船坐百幾人咁樣落嚟香港。啲船設備簡陋、污糟，警察有時見住啲大肚婆縮埋一嚿咁坐埋一邊，都唔忍心，但無奈真係無得放行。

後嚟因為抵壘政策吸引越嚟越多大陸居民嘗試偷渡落嚟香港，最後喺1980年10月，港英政府宣布取消呢個政策，改為「即捕即解」，所有偷渡客一旦被捉到就會被遣返。自此之後，法例規定15歲以上嘅市民出街要帶身份證，有需要時警員會突擊檢查。

原圖取自網絡。