唔知各位史友，尤其是揸開車嘅，有無去過馬頭角十三街呢？阿史就去過幾次，呢個地方都幾特別，十三街北面係木廠街、南面係馬頭角道，另外十一條街由西至東分別係龍圖街、鳳儀街、鹿鳴街、麟祥街、鷹揚街、鵬程街、鴻運街、蟬聯街、燕安街、駿發街及鶴齡街。十一條街嘅名都有一隻有吉祥兆頭嘅動物喺度，幫呢十一條街改名都幾有心思。

同依家十三街車房眾多、相對冷清嘅情況唔同，舊時嗰帶好熱鬧。依家牛棚藝術村嘅前身係馬頭角牲畜檢疫站，屬於戰前檢疫同屠宰牛隻嘅地方。舊時响牛棚對面嘅十三街搭咗好多木屋仔，好似大排檔咁，擺賣嘅物品應有盡有，有居民話每日劏豬佬同大量車輛出入，又旺又熱鬧，不過品流相對複雜，佢哋會圍埋賭錢，有時仲會打交，加上半夜劏豬，會聽到啲豬响度大叫，可以話係充滿舊日特色。去到1969年長沙灣屠宰場落成，牛棚開始卸下重擔，只負責檢疫工作，令附近人流大減，不復往日熱鬧。

十三街依家成為車房集中地，但就保留咗傳統打鐵、燒焊、印刷、玩具製造等店鋪，保留工藝文化。而十一條神獸街長度同闊度相約，嗰一帶嘅唐樓高度差唔多，外牆七彩繽紛，樓齡超過50年，等待重建機會。

原圖取自網絡。