宜家科技發達，每個有智能手機嘅人都會裝返一兩個即時通訊apps方便同親戚朋友傾偈,除咗WhatsApp之外，WeChat（微信）應該係最多香港人會用嘅apps。唔講唔知，原嚟喺舊年，微信嘅全球每月活躍用戶數量突破10億，即係話地球上有成七分之一嘅人都有用微信嘅習慣。微信嘅母公司騰訊，同樣創造出多項佳績，喺短短20年間，由一間小小企業變為市值破萬億嘅科網巨企，依張成績表背後，源於創辦人馬化騰「開荒牛」嘅故事。

馬化騰大學果陣主修電腦， 1993年佢大學畢業，已經有創業嘅諗頭——為客戶組裝電腦。當時幾乎所有早期型號嘅電腦，馬化騰都有親手砌過。之後佢轉去深圳一間做傳呼機系統嘅公司打工，一做就係6年，成為當時內地較早接觸互聯網（當時叫做「惠多網」）嘅一批人。

喺開通同管理「惠多網」期間，馬化騰留意到傳呼系統同互聯網之間嘅微妙關係，同埋兩者融合嘅可能，令佢萌生出優化通信方式嘅想法。1998年，馬化騰同朋友一齊喺深圳創辦騰訊，仲開發出即時通訊軟件「OICQ」，即係後嚟嘅QQ。馬化騰創業初期度過一段非常艱難嘅境況，公司出現融資困難，甚至無錢買伺服器，後嚟先搵到盈利方法，慢慢發展起嚟。之後騰訊要同另一嘅即時通訊品牌「MSN」競爭，於是騰訊針對當時內地特殊嘅網絡結構去改善，令用戶可以快速咁發送文件，令自己嘅產品更適合國內用戶，贏咗漂亮嘅一仗。

隨著互聯網及用家習慣轉變，騰訊亦開始轉型。喺智能手機啱啱興起嘅年代，騰訊就推出微信，將即時通訊軟件帶到移動網路平台。騰訊仲積極創新，宜家騰訊嘅全球專利申請數量已經超過25000件，而喺互聯網層面上，騰訊嘅專利申請數量仲排到全球第二，認真威水。此外，騰訊亦不斷開拓新技術範疇，開設人工智能、機器人同量子技術等專門實驗室。而馬化騰亦憑住一手打造嘅科企王國，成為富豪排行榜常客。

原圖嚟自網絡。