上個月去完元朗嘅小學之後，史檔工作室好榮幸再次收到邀請，响今日去到九龍塘學校（小學部），為一班小四到小六嘅同學仔分享《區區有故講》故事。

今次九龍塘學校（小學部）嘅同學仔好踴躍答問題，舉手速度可以話係快如閃電，有好幾次未問條問題，已經有好多同學仔舉手想答，個樣仲胸有成竹添。當問到海洋公園前身係咩地方時，有唔少同學仔認為係叫「威威公園」，不過都有同學仔好醒目，揀「新巴黎農場」做答案，因為佢覺得農場要好大地方，同海洋公園嘅面積襯到絕，邏輯同判斷力兼備，真係要畀個Like佢~

數到最有創意嘅答案，就要提一提油麻地喇。其中一條問題係問油麻地點解叫油麻地？有位同學仔話係地底好多油同埋有好多麻雀飛過，認真創意滿分。

做完講座離開校園之際，史檔工作室發現原來作家白先勇同傳媒人劉天賜等等都係九龍塘學校嘅校友。白先勇係邊位？（唔好驚訝，小鮮肉同事真係唔知）之唔係《驀然回首》嘅作者，大家仲記唔記得篇文講咩？