返工放工果陣，經常會喺公司棟大廈見到有個生得唔錯嘅女仔，平時都會同阿史點頭打招呼，好有禮貌吓。點知有一日無意中見到佢喺樓下食煙，仲要邊食邊對住個電話爆粗，講啲說話都幾惡毒難聽吓，即刻令阿史之前對佢嘅好印象破滅晒，呢啲咪就係大家平時講嘅「好眉好貌生沙蝨」囉。 依句話通常用嚟形容一個人金玉其外，但就敗絮其中。不過「好眉好貌生沙蝨」初頭指嘅就唔係人，而係指番薯。「好眉好貌」就梗係講嚿番薯明明望落去靚靚仔仔咁，點知返到屋企一煮，係臭嘅！搣開番薯啲皮一睇，原嚟裡面有一粒粒黑色嘅窿仔，呢啲就係沙蝨喇。不過，依家呢句通常都係用喺人身上多啲，反而無乜人知佢原本係講緊番薯。 原圖嚟自網絡。