近排惠英紅小紅姐真係好紅又好旺，唔單止夜晚有套電視劇《鐵探》擔正咗女主角，同Benz雄、黃智賢等好戲之人同台，霸氣到暈，尋日仲憑住《翠絲》攞埋金像獎最佳女配角，認真威水。唔講唔知，原來紅姐係首屆金像獎最佳女主角？

睇返資料同之前嘅報道，小紅姐細個曾經瞓過樓梯底、成家問酒樓攞餸頭餸尾食足大半年、賣香口膠時畀外國水兵推落地、被警署拘留，童年生活嘅經歷，雖然令小紅姐失去讀書機會，但令佢學識觀察人，相信對佢往後揣摩角色有所幫助。

點解會踏足娛樂圈？當年灣仔有戲院舉行首映禮，小紅姐見到個靚靚主角，就定下目標，想做到對方咁。惠英紅十幾歲去咗夜總會做舞女，咁啱導演張徹拍《射鵰英雄傳》，間公司就去後台揀角，令佢有機會演出重要角色穆念慈。

惠英紅戲裡戲外都「好打得」，非常硬淨。八十年代初佢首次有機會擔正，成為電影《長輩》嘅女主角。不過挑戰同難關總係無處不在，拍咗十幾日，佢有腸胃炎，後尾仲變成腹膜炎，暈低响片場。經歷四粒幾鐘嘅手術之後，小紅姐連線都未拆就繼續開工，怕嘅係被換角，失去大好機會，當時佢嗰身都企唔直，攣住出院開工。捱餓、窮苦、疾病、痛楚，全部都阻礙唔到惠英紅發光發熱，佢憑《長輩》勇奪第一屆金像獎最佳女主角，過程縱然辛苦，但結果仍然甜美。

去到九十年代，文藝愛情片好受歡迎，做開打女、俠女嘅小紅姐想轉型，點知老細唔肯。佢後嚟工作唔太順，患上抑鬱，曾經試過自殺，全靠屋企人同好朋友嘅支持同鼓勵，先漸漸康復。風雨過後見彩虹，人生閱歷同經驗更加豐富嘅小紅姐，2010年憑住《心魔》，相隔二十幾年後再成為金像影后。今屆金像獎之前，佢已經憑住《殭屍》拎過最佳女配角，既係優秀嘅主角，更加係出色嘅配角。

原圖嚟自網絡。