講起上世紀轟動香港嘅搶劫案，就不得不提賊王葉繼歡持AK47打劫珠寶金行，仲同警方開槍搏火嘅世紀重案。葉繼歡嘅故事近年成為多部港產電影嘅主題，例如1996年任達華主演嘅《悍匪》、2010年黃子揚主演嘅《最危險人物》同埋2016年任賢齊主演嘅《樹大招風》。不過每個人都要為自己所做嘅事負責，犯下重案嘅葉繼歡最終被捕，喺監獄同醫院中度過餘生。

葉繼歡17歲偷渡嚟香港，1984年佢同同黨連環持械行劫尖沙咀景福金行同中環置地迪生錶行。之後有警員扮成買家，成功拉人，葉繼歡因處理贓物同無牌管有槍械罪成，被判囚16年。1989年8月，葉繼歡訛稱肚痛，由赤柱監獄被押往瑪麗醫院檢查期間逃獄。之後佢匿埋兩年，再次重出江湖，喺1991年持AK47連環打劫觀塘物華街五間珠寶金行。

1992年，葉繼歡食過返尋味，打劫觀塘同旺角共7間金行，第二年再行劫旺角彌敦道謝瑞麟珠寶金行，期間葉繼歡用AK47同警方喺街頭駁火，又曾挾持人質向執法人員開槍，兇悍程度震驚全城，搞到果陣人心惶惶。警方當時將葉繼歡列為頭號通緝犯，懸紅100萬。

葉繼歡1996年持軍火喺西環登岸，遇上軍裝警察截查，雙方駁火期間，葉繼歡中槍，導致半身不遂，佢其後被判監36年零3個月。2017年今日，患癌嘅葉繼歡逝世，令一代賊王嘅人生畫上句號。

原圖嚟自網絡。