阿史嘅同事最近好鬼黑，近排喺公事上仲搞出個大頭佛，佢今次都唔知點收科好。

我哋平時講嘅「收科」有圓場、收場嘅意思，係源自宋、元、明朝間嘅戲文術語。戲曲講求「科諢」，即係令觀眾發笑嘅語言同動作，戲曲裡面講嘅「插科打諢」係指加入一啲滑稽好笑嘅橋段，等劇情輕鬆搞笑啲，而「收科」個「科」字就嚟自「科諢」。「收科」多見於南戲本子，如《張協狀元》、《荊釵記》等，等台上一段插科打諢就嚟完嘅時候，就會安排其他角色出嚟結束呢段插科打諢，呢個情況就叫做收科喇。

其實「收科」並唔係廣東話獨有，受元明朝代戲文影響，「收科」早就形成民間口語，除咗廣東之外，喺安徽等地亦有唔少人用緊。

圖為京劇丑角演出，原圖嚟自網絡。