無綫1997年播咗套電視劇《保護證人組》，主角王喜同魏俊傑係保護證人組嘅警員，內容係講述佢哋面對嘅唔同挑戰。現實中，保護證人組係特種部隊之一，响1995年成立，主要任務係執行「保護證人計劃」，全天候保護受生命威脅嘅證人同佢嘅家人，以及警員臥底。當年賊王之一、綽號「大富豪」嘅張子強涉及1.6億港元嘅解款車劫案，保護證人組就曾經全天候保護一個指證張子強嘅保安。

至於當初點解會成立保護證人組？話說喺九十年代初，香港發生咗一單謀殺案，因為控方一名主要證人拒絕出庭作證，搞到件案被迫中止。後嚟政府同警隊為咗加強保護證人，鼓勵證人作證並幫助佢哋克服恐懼，於是就响1995年成立證人保安委員會，推行「保護證人計劃」。

依家嘅保護證人組有正規隊員，亦有兼任隊員，兩者都要接受基礎訓練同延續訓練，而正規隊員要接受各式各樣在職專業訓練，例如槍械、戰術、炸彈處理、消防、行動性駕駛、搜查技巧同急救知識等，需時長達四至五年，訓練一啲都唔輕鬆。至於電視劇出鏡率唔低嘅安全屋，就係方便保護證人組貼身保護證人，當局通常會揀啲唔太起眼嘅民居、工廈或酒店房，等外界難以估計證人藏身地點。

圖片為劇照，取自網絡。