記得細個上美術堂個陣，要畫香港嘅話通常都會畫山頂嘅「老襯亭」。呢個外型咁特別嘅建築物建於1972年，樓高兩層。雖然發展商香港大酒店幫呢座建築物正名為「凌霄閣」，但一般市民都係鍾意叫佢做「老襯亭」，因為幢嘢嘅原址係觀景亭，即係「老襯亭」。大樓頂樓係一間西餐廳，阿史記得當年啲大人話老襯亭頂層係旋轉餐廳，但到今日都唔知呢個答案係真定假。