之前入咗旺角場睇波，相信有睇本地波嘅史友都知如果坐地鐵去旺角場，就要响太子落車而唔係旺角，咁係因為太子其實唔算係一個地方名，只係一個地鐵站名稱。

咁即係點呢？如果大家有留意嘅，都知太子站英文係Prince Edward，呢個就係英國嘅愛德華王子。話說，响1922年，愛德華太子訪港，之後由旺角一帶通往九龍城嘅一條馬路就以佢個名命名，中文就譯做愛德華皇子道，後嚟就叫太子道。

後嚟，1979年地鐵嘅「修正早期系統」通車，响旺角北邊有一個站，但就無用「旺角」做名，而係以太子道嘅「太子」嚟命名個車站。之但係，太子其實仍屬於旺角區，好似旺角警署同旺角大球場，都係响太子站附近。