阿史之前講過，港島南區有好多同香港歷史有關嘅地方。阿史又去行咗個圈，去咗位於赤柱嘅軍人墳場。

呢個墳場係香港開埠最初期1840年代的軍人墳場之一，因為英軍當時佔領香港島無耐，就响赤柱呢個地方駐紮，唔講唔知，赤柱係香港開埠初期嘅首府，居民數有成二千人，算係一條大漁村，而清朝時呢度都有軍營，所以英軍都响度設置軍營，直至回歸。赤柱軍人墳場就係响咁嘅背景下出現喇，最初墳場係安葬英國駐港英軍及其家屬，係响19世紀60年代曾經關閉，直到1942年重開。

墳場重開係同香港一段重要歷史有關，就係香港淪陷。赤柱係香港淪陷前英軍最後一處駐守地，當時駐守英軍同日軍曾經喺度爆發激戰，最後英軍戰敗，聖士提反書院及英軍軍營成為集中營，而保衛香港嘅死難者、戰俘等都安葬於墳場內。據講，當時墳場成為戰俘們避難同沉思嘅地方。

赤柱軍人墳場現時安葬咗590名二戰英聯邦士兵，仲有百幾名死於二戰嘅平民。而喺2006年，墳場內豎立起新嘅紀念碑，以銘刻940名一戰死難者同1500名二戰時嘅死難者名字。

赤柱軍人墳場記載咗香港淪陷嘅歷史，各位史友有機會可以去一去呢度，向當日為香港犧牲嘅軍人致敬。

圖片來源：阿史