豆腐大家就食得多喇，咁又知唔知豆腐係點樣嚟同埋邊個發明嘅呢？嗱，阿史唔係講衰嘢，而係講緊真係用豆整成、食得嘅豆腐呀。

據《本草綱目》等古籍記載，豆腐始於淮南王劉安。劉安係漢高祖劉邦嘅孫，成日都掛住煉丹成仙，所以不惜落重本廣招方術之士。呢班方士用山入面嘅泉水嚟磨制豆汁，又用豆汁培育丹苗，點知仙丹就煉唔成喇，反而係豆汁同石膏、鹽等物質產生咗化學作用，變成嫩滑嘅好似豆腐嘅物體。當時有人好奇試咗一啖，覺得好滑好清甜，於是劉安就同方士一齊研究改良，終於可以令豆汁凝固，仲改咗個名叫菽乳，後嚟先變成「豆腐」。就係咁，劉安煉煉吓丹就無意之中發明咗豆腐，都可謂係無心插柳柳成蔭，劉安仲因此有「豆腐神」嘅稱號。

古代據講每個製造豆腐嘅地方，都會有個小小嘅淮南王祭壇，工人開工前後都要上一上香俾「豆腐神」劉安，呢個習俗仲一路保留到民國時期。不過，宜家嘅豆腐工場，應該都唔知劉安係邊個喇。

圖為劉安像，原圖嚟自網絡。