「問世間情是何物」，名作家金庸逝世，佢留低俾我哋嘅唔止係筆下躍然紙上嘅人物，仲有小說入面表達出嚟價值觀同豐富情感。

有人問過金庸，覺得自己嘅邊部作品寫得最好？金庸就話呢個問題佢答唔到，佢嘅15部小說各不相同，分別注入咗佢當時嘅感情同思想，主要係感情。不過，佢本人就比較中意感情較強烈嘅幾部：《神雕俠侶》、《倚天屠龍記》、《飛狐外傳》、《笑傲江湖》。金庸嘅小說都離唔開一個「情」字，呢4部作品入面，以《神雕俠侶》入面楊過同小龍女嘅感情最折磨人，兩人嘅師徒關係從一開始就不容於世俗，中間仲要經過九九八十一難，等咗成16年後先再相見。

而《倚天屠龍記》，男主角張無忌同小昭之間嘅情就令金庸最惆悵，小昭為咗佢最愛嘅張無忌，不惜遠走，令張無忌遠離危險，臨別前小昭默默流淚果一幕，阿史宜家都仲印象深刻。金庸自己都話4個女角之中，佢最愛小昭，只可惜唔能夠俾佢同張無忌喺埋一齊。講到最深刻嘅友情，莫過於《笑傲江湖》裡面嘅曲洋同劉正風呢對知音，兩人立場背景可謂正邪分明，劉正風寧死都唔肯殺咗曲洋，兩人臨死前合奏一曲〈笑傲江湖〉，曲洋慨嘆，就算世上再有曲洋、劉正風，二人未必生於同時，相遇結交。

金庸小說入面嘅「情」從來都唔止一種，對家國嘅情、對親人嘅情、對朋友嘅情、對愛人嘅情，凡此種種，金庸都有深刻嘅描畫，仲可以將佢哋寫埋一齊，突出矛盾同取捨，例如《書劍恩仇錄》入面陳家洛中意香香公主，但為咗佢嘅復興大計，忍痛割愛，最終令香香公主自殺身亡。

喺金庸嘅作品裡面，好多情節都圍繞住情字嚟寫，絕對有洋蔥，寫寫吓，阿史又係時候重溫返金庸嘅經典作品，懷緬依位一代名家。