澳門喺1922年5月尾發生轟動中外嘅「捷成事件」，搞到澳門陷入蕭條。話說件事响1922年5月28日7點發生，一個女仔喺澳門果欄街嘅綢布店外等緊黃包車，被附近一名黑人葡兵眼甘甘咁望實，於是女方就急急腳走人，點知個葡兵吊住佢尾，去到一個暗啲嘅地方就上前攬住個女仔。個女仔即刻大叫救命，附近剪髮鋪嘅學徒隨手拎起支門閂，衝出去扑個葡兵一嘢，同個葡兵糾纏起上嚟，剪髮鋪老闆亦都幫手，個葡兵就走去新馬路警崗。

剪髮鋪老闆同學徒繼續追住個葡兵，尾隨一班上前幫手嘅華人。成班人去到警崗，警員吹警哨，即刻有七、八個警察上前，拉咗個剪髮鋪老闆同學徒，困咗喺附近瑞安碼頭一間警署（捷成戲院舊址）入面，搞到群情洶湧，幾百人聚集喺警署外要求放人。到咗29日凌晨，澳門六十幾個華人團體共過萬人包圍警署，期間有軍警換班，一班華人湧前，葡軍中隊長弗利中校舉槍要求讓開不果，就下令開槍，唔少華人中槍倒地，造成70人死、百幾人受傷。其後葡軍將遇害華人嘅遺體拋落海，又聲稱葡軍執行任務期間遭到亂黨襲擊，被迫自衛。

事件激起民憤，澳門超過六十個工商界、學界團體响29日當日發起全澳華人罷工、罷市同罷課。澳葡政府就採取高壓政策，宣布全境戒嚴，封鎖關閘，唔俾華人去內地，又要脅華人要迅速復工、復市同復課。澳門各團體領袖就搵廣東軍政府幫手，喺孫中山介入下，循外交手段向澳葡政府施壓，又派軍艦到附近海域。澳門華人當時強烈要求回歸，再加上長時間「三罷」，令澳葡政府轉軚，同團體領袖談判，承諾向死難者家屬同傷者發放撫恤金、超渡亡靈、取消亂黨名目等。

圖為當年駐澳門葡軍，取自網絡。