喺1925年5月30日，上海爆發「五卅慘案」，造成十幾人死亡、幾十人受傷及被捕。慘案源於五月中嘅一場勞資衝突，話說當時日本商家喺上海開設十幾間紗廠，居然肆意剝削同虐待啲中國工人，工人每朝5點半之前就要入工廠，連續工作12至26個鐘，無時間食飯之餘，仲要人工極低。响5月15日，有班工人發起罷工，廠商威脅關閉廠房嚟餓死啲中國工人，雙方發生衝突，期間廠商開槍，造成多名工人受傷，其中20歲嘅工人顧正紅身中多槍死亡。

之後上海一批大學生喺街頭募捐以及前往顧正紅追悼大會期間，被以英國為首嘅租界當局拘捕。到咗5月30號開庭嗰日，近3000名學生上街派傳單同演說，抗議帝國主義屠殺中國工人、拘捕中國學生，結果租界當局出動武裝巡捕，大肆拘捕學生，單喺南京路老閘捕房就關押咗過百個學生，觸發過萬名群眾圍堵捕房門口要求放人，英國捕頭下令巡捕開槍，當場打死咗13人，另外有多人重傷及被捕。

到咗6月1日，上海率先爆發罷工、罷課、罷市，獲北京、廣州、青島、武漢、天津、南京、重慶同香港等多個城市嘅民眾聲援。日資工廠六月底同工人達成協議，承諾廠商以後唔可以攜帶武器、給予顧正紅家屬1萬撫恤金、賠償工人罷工期間損失，以及處分兇手，其後上海嘅工人陸續復工。

圖為五卅運動，取自網絡。