金庸小說咁多年嚟不斷被改編成電影、電視劇，一部小說嘅電視劇有成幾個版本，唔同版本嘅改編都有各自嘅粉絲。而金庸對呢啲改編嘅作品嘅準則好簡單，就係要忠於原著，佢話刪減內容可以，但唔好自作聰明咁增加故事情節入去，搞到結果唔和諧，露馬腳，甚至獻醜。就係因為呢個原則，金庸最討厭徐克改編嘅《笑傲江湖》，因為由著名女演員林青霞飾演男角東方不敗，仲話徐克不懂武俠，講明以後朋友照做，但合作就免喇。

作為原著，金庸基本上對好多版本嘅改編都唔係咁滿意，當然佢亦有比較中意嘅版本，例如劉德華同陳玉蓮版嘅《神鵰俠侶》，金庸話呢一版嘅楊過同小龍女非常符合佢小說嘅味道。仲有鄭少秋、汪明荃主演嘅《書劍恩仇錄》，果版嘅《書劍》，鄭少秋一人分飾陳家洛、乾隆、福康安三個角色，每個人物嘅性格特點，鄭少秋都拿捏得好好，而佢更憑住呢套戲一舉成為香港演藝界嘅第一小生。金庸對呢部戲相當滿意，佢話鄭少秋果陣演嘅乾隆皇帝十分到位。

講起咁多版嘅小龍女，金庸惟獨欽點內地演員劉亦菲，話佢「很像小龍女」，咁嘅評價由原著口中講出來，說服力相當高。不過講到金庸最愛嘅女演員，就非周海媚莫屬。周海媚當年憑住周芷若一角走紅，金庸仲特登去搵周海媚見面，話周海媚係佢最中意嘅女演員，仲話如果一早知道由周海媚演周芷若，佢就改劇本，可見佢對周海媚嘅喜愛。

正所謂一百個讀者，就有一百個哈姆雷特，每個演員本身嘅外貌、氣質都會影響對角色嘅詮釋，每版嘅改編都有佢嘅可取之處。不過，最原始、最經典嘅始終都係金庸嘅原作。

圖為《笑傲江湖》、《書劍恩仇錄》、《神鵰俠侶》、《倚天屠龍記》主角造型。網絡圖片