之前提過八十年代中英兩國就住香港前途問題進行談判，但中方就堅持唔俾港人代表參與其中。實際上，當時香港一班政界人士，就香港前途問題响中英雙方之間游走。响1982年戴卓爾夫人訪京後，行政局首席非官守議員鍾士元响1982年12月會見戴卓爾夫人，佢响回憶錄就話當時佢怪英方代表隱瞞港人關於前途談判嘅內容，而英國方面答應英方代表會同行政局成員合作制訂談判策略，不過英方就始終無答應行政局非官守議員要求，俾議員隨團赴京作幕後顧問。此後亦行政立法兩局議員都有到倫敦表達港人嘅意願。另一方面，鍾士元、鄧蓮如同利國偉响1984年6月到北京，仲得到國家領導人鄧小平接見，不過鄧小平就响會面中講明香港前途問題係中英兩國嘅事，無所謂「三腳凳」存在。

可以咁講，由於香港無代表參與中英談判當中，香港嘅部分議員只能夠分別同兩邊表達香港人嘅諗法同憂慮。