阿史講咗唔少八十年代中英談判嘅歷史，今次就想介紹下粉嶺一個同中英談判有關嘅地方，就係粉嶺別墅。

粉嶺別墅以前叫港督粉嶺別墅，係响1934年建成，回歸後就易名為行政長官別墅。呢座港督同行政長官專用嘅別墅，有時會作為招呼外賓同舉行宴會之用。不過，據一啲官員憶述，呢個地方其實係八九十年代中英談判嘅秘密場所。

中國同英國响1984年簽署《中英聯合聲明》，落實咗英國將香港主權於1997年還返俾中國。回歸有期，中英雙方就响呢個過渡時期就著各方面問題進行磋商，有啲係公開，有啲就唔公開。金管局前總裁任志剛就响回憶錄當中，話响1988年12月，中英代表就响粉嶺別墅開咗一次秘密會議，而佢、時任財政司翟克誠、金融司林定國就以港府官員身份出席，呢次秘會就奠定後嚟金融管理局成立嘅基礎。佢仲話之所以响粉嶺別墅開會，係因為方便幾位中方代表從深圳坐直升機過香港。

另外，响八九十年代出任港澳辦基本法委員會秘書處司長嘅陳佐洱，响回憶錄就話過1991年秋天嘅一個周末，跟隨時任國務院港澳辦主任魯平去香港，同港督衛奕信進行秘密會談，而地點亦係粉嶺別墅。

講返轉頭，之前有前高官議員話响中英談判期間，港人代表包括佢自己，有充分參予。阿史無估計錯誤嘅話，議員講嘅應該係《中英聯合聲明》簽署後嘅事。