阿史有日同秘書妹妹傾開計，講起鉛筆最初真係用「鉛」嚟做嘅，秘書妹妹好大反應咁問：「你呃鬼食豆腐咩！用鉛做筆咪好容易中鉛毒？」一問就知秘書妹妹肯定無睇史檔今個禮拜一嘅鉛筆post喇！

講返「呃鬼食豆腐」先，點解會有呢個講法？話說喺每年嘅農曆七月十四係盂蘭節，相傳呢一日鬼門關會打開，等鬼魂可以返人間受奉祀。而為咗防止無主孤魂嚟搵替身，家家戶戶都會喺呢日奉上豬呀、雞呀呢啲比較得體嘅祭品，等鬼魂食飽飽唔好嚟搞搞震。但係，舊陣時好多人都買唔起肉嚟供奉，唯有用又平又無乜味嘅齋菜，好似豆腐呢啲平價祭品嚟祭鬼。之不過，啲鬼會唔會連豆腐同肉都分唔到，咁容易上當呀？

其實，「呃鬼食豆腐」係「呃鬼食道符」，因為「豆腐」嘅讀音同「道符」非常接近，會聽錯、撈亂都唔出奇。由於鬼魂好怕道士嘅符咒，所以好難呃到佢哋食道符。於是，就有人將呢種行為叫做「呃鬼食道符」，意思即係話有人用啲低裝手法嚟呃人，但「鬼」先唔會咁蠢、咁易被呃到。 

圖為《區區有鬼故》劇照，原圖嚟自網絡。