之前上網睇文，話近年香港唔少露營人士對郊外環境造成相當程度嘅破壞，其中一個例子就係塔門島上弓背山坡嘅草地有啲寸草不生嘅情況。

提起塔門，大家可能會覺得呢個島係熱門郊遊地點，其實呢個島以往係新界地區一個好出名嘅漁村。據講，早响明代塔門已經有人居住，島上嘅天后廟就係响清代乾隆年間建成，而最先開發塔門嘅係黎姓嘅家族。由於島有個小港灣，加上島上有淡水，所以就慢慢成為一條小漁村，最高峰時島上有成二千人居住。話明係小漁村，塔門自然係海產資源豐富，而最出名嘅就係鮑魚。曾幾何時，塔門鮑魚五十年代可以大量出產，連其他地方嘅漁船都會去塔門採鮑魚。可惜嘅係，由於來自四方八面嘅漁民過分捕捉，加上本港水質不斷污染，令到塔門鮑魚的數量銳減，塔門一度遠近馳名嘅鮑魚幾乎絕產。

隨住社會發展，塔門嘅捕魚業式微，島上嘅青年居民都多數去市區工作同生活，依家嘅塔門就慢慢成為市區居民周末周日嘅郊遊地點，仲係唔少露營愛好者嘅紮營地點。不過，似乎呢個島嘅自然環境唔係好頂得順咁多遊客喎。