唔知係咪因為公司「陽氣」比較重嘅關係，阿史近排發現秘書妹妹被眾多男同事同化咗，變到有啲「麻甩」，例如會同男同事一樣中意望靚女，仲要好認真咁一齊討論靚女。

所謂麻甩，本來係用嚟形容一啲粗鄙、唔注意個人衞生嘅男人，宜家都逐漸開始用嚟形容一啲比較粗豪、似男人嘅女人。據講佢源自一個法文詞語「malade」（即係生病，音似麻甩），話說以前廣州有好多比利時嚟嘅傳教士醫生，每當有病人上門求醫嘅時候，就會用法語講「malade」。廣州人聽唔明法文，仲以為係「男人」咁解。當時廣州人對外國人無乜好感，於是就用「麻甩」嚟指粗鲁嘅男人。

仲有另外一種說法話，麻甩嘅正寫係麻笠，笠係指古時用竹編成嘅帽，古時嘅人舉行喪禮果陣需要披麻帶孝十幾日，佢哋戴嘅帽就叫做笠。通常以前擔幡買水嘅都係長子嫡孫，佢哋喺守孝期間，唔可以除喪服沖凉，十幾日之後身上自然會因流汗而發臭。所以麻笠佬呢個詞就係咁演變成不修邊幅、唔注重衞生嘅男人嘅代名詞。

講咗咁耐，唔知你哋身邊有無啲好似秘書妹妹咁，有小小麻甩嘅女仔呢？