唔知大家以前讀中小學果陣，有無睇過何紫嘅作品呢？阿史第一次見到「何紫」呢個名嘅時候，一度以為佢係位女作家，直至後來上網搵過佢嘅相，先至發現真相。

已故兒童文學家何紫，原名何松柏，籍貫廣東順德，喺澳門出世，後嚟移居香港。何紫細細個係個頑童，讀書唔叻，操行不佳，老師就俾個照顧低年班學弟妹嘅重任過佢，何紫就靠「講古仔」嚟令學弟妹投入，維持秩序。因為要講古仔，何紫睇咗好多兒童讀物，偶然又會臨時創作，開始同寫作、兒童文學結緣。成年之後，何紫曾經喺培僑中學做過老師，後嚟去咗《兒童報》擔任編輯，亦會喺報紙專欄度寫兒童故事。1918年，何紫創辦山邊社，專門出版兒童、青少年讀物，著名作家阿濃、小思嘅作品都交由山邊社出版，大部份出版嘅書都係何紫親自審稿、排版、設計同埋督印。

何紫幾乎將生嘅時間都用係推廣兒童文學身上，佢組織香港兒童文藝協會嚟推動香港兒童文學，曾創辦「香港兒童文學節」。1986年，何紫覺得香港無專門供青少年閱讀嘅文學雜誌，於是創辦《陽光之家》月刊。1990年，何紫患上癌症，期間仲堅持寫作，寫咗《我這樣面對癌病》、《少年的我》、《成長路上的足印》、《給中學生的信》、《給女兒的信》等多部著作。佢嘅作品，除咗描寫兒童喺生活同學習上嘅挑戰之外，仲會觸及當時嘅青少年問題，例如有黑社會入侵校園，不良讀物普及對青少年價值觀嘅影響。

1991年今日，何紫病逝，不過佢嘅書會一直陪伴住一代又一代嘅香港青少年成長。

圖片嚟自香港兒童文藝協會官網。