尋日荃灣葵青嗰邊有遊行，令包括荃灣眾安街在內嘅街道氣氛緊張。提到眾安街，如果大家唔係住開荃灣嗰邊未必知，眾安街喺50年代嗰陣其實係荃灣唯一嘅街道嚟，亦係荃灣最早嘅市集。眾安街呢個名係源自1930年代，前新界鄉議局主席陳永安喺度開設「大眾茶樓」同「平安藥局」，條街就以呢兩間鋪命名。條街唔單止有咁上下歷史，仲好「旺」添，點解？因為眾安街堪稱係連鎖快餐店大快活同埋化妝品店莎莎呢兩個本土品牌嘅發源地。

根據大快活官網，集團創辦人羅芳祥、羅開福喺1972年創立大快活，並且喺眾安街開設首間大快活快餐店。而《福布斯》報道過，莎莎創辦人郭少明同太太郭羅桂珍同樣喺70年代初，喺眾安街一帶賣化妝品，之後響銅鑼灣總統商場開店。兩個品牌其後於1991年同1997年上市，業務遍佈港九新界。

講返眾安街，舊時葵涌同青衣等地嘅市集仲未發展成形，唔少市民都會搭車搭船咁去到眾安街一帶，貪嗰度商鋪多，選擇都多啲。到咗2003年，政府為咗重建經濟、強化荃灣特色，於是就將眾安街、沙咀道、川龍街及街市街組成「荃灣珠寶金飾坊」，現時眾安街有唔少珠寶金飾店進駐，所以眾安街亦有「珠寶街」呢個稱號，唔少旅客都會前往消費。

圖為眾安街，取自網絡。