上環最多嘅就係海味店，又有邊個估到眾多嘅海味店之中，竟然隱藏住一間特色店鋪？依間雷鳴春同雷生春僅一字之差，不過雷鳴春嘅全稱係雷鳴春精補精藥行，專賣壯陽藥，叫得通俗啲，即係土炮春藥店。唔好睇少佢，估計自1910年代起，呢間鋪就已經開業，最早嘅時候係叫做「廣德堂」，開頭獨沽一味只售壯陽藥。從宣傳品嘅「京都雷鳴春精補精」字眼，估計店鋪嘅藥方可能嚟自日本京都，並於香港代理出售。

隨住西藥嘅興起，呢一行慢慢式微，原本嘅上環老店就已經唔存在，剩低嘅皇后大道西樓上鋪，上年亦都被清空，鋪內嘅百年文物、招牌等更慘遭拍賣。已經停止製藥成二十年嘅雷鳴春，最後只係响大家嘅回憶入面留低足跡。

圖片嚟自網絡。