之前講起啟德機場同赤鱲角機場嘅歷史，不過原來當年計劃起新機場嘅時候，香港政府曾經考慮過其他選址，當中包括吐露港、南丫島、長洲等等香港人熟悉嘅地方，其中南丫島仲係最後兩個選項嘅其中之一添。阿史真係好難想像機場起喺南丫島會係點，今日就同大家介紹吓呢段歷史喇！

話說响60年代，民航處預計到80年代會出現航班增長同航運需求增加嘅情況，於是喺70年代就開始探討點樣滿足需求，避免因為機場處理唔到更多客貨運量造成經濟損失。政府當年考慮過幾個唔同方案，包括擴建啟德機場、起多一個機場，同埋起過一個新機場。之後衡量到啟德擴建空間不足等因素，傾向將機場搬遷，當時有唔同新機場選址，包括后海灣、吐露港、南丫島、長洲、稔灣同赤鱲角等等。到咗80年代，政府就主要討論南丫島同赤鱲角呢兩個選址，當時政府建議喺南丫島西面嘅西博寮海峽建造人工島起機場，潛在嘅航班處理量將會比赤鱲角更高，但最終點解會揀咗喺赤鱲角起機場呢？

話說喺1989年，政府詳細比較南丫島同赤鱲角兩個選址嘅時候發現，南丫島比起赤鱲角方案限制更多，政府估計一旦喺南丫島興建新機場，所需時間較赤鱲角長2年，到時香港因為機場飽和面臨嘅經濟損失將會更大，另一方面南丫島選址海域海底淤泥含有各種氣體，損害環境，亦不利填海工程進行。政府亦考慮到建設整體運輸網絡、發展潛力等等因素，最終決定喺赤鱲角興建新機場。

圖為南丫島，取自網絡。