國學大師錢穆離世至今已有整整29年，佢嘅學術著作《先秦諸子繫年》、《劉向、劉歆父子年譜》、《國史大綱》等，對中國歷史文化方面貢獻良多。除此之外，錢穆對香港中文大學嘅建立亦有好大淵源。

錢穆字賓四，江蘇無錫人，佢天生聰穎，博學強記，七歲入私塾讀書，即使喺辛亥革命學校停辦期間，錢穆依然堅持自學。1949年，錢穆嚟香港創立亞洲文商夜書院，翌年改為新亞書院，並由錢穆出任首任校長。之後香港政府邀請新亞書院組建香港中文大學，錢穆堅持中大應該以發揚中國文化為宗旨，並且以中文作為授課語言、第一任校長必須由華人擔任嘅原則，奠定咗中大日後嘅發展方向。

1965年6月，錢穆辭任新亞書院院長，兩年後遷居台北，先後擔任中央研究院院士同中國文化學院史學教授。1990年今日，錢穆逝世，享年96歲。

原圖嚟自網絡。