上個禮拜同大家講咗著名畫家張大千同四太太徐雯波嘅故事，今日再講多個關於張大千同著名藝術大師畢加索嘅一次世紀會面。作為中西畫壇巨擘，佢哋嘅作品成交總額喺近年嘅市場調查係最高嘅，但就好少有人會同時提起佢哋，不過其實大家有無諗過佢哋嘅作品都有受對方風格影響？關鍵可能就在於佢哋喺巴黎嘅一次會面。

話說張大千曾經喺巴黎出席個人畫展揭幕儀式，一身優雅旗袍現身嘅徐雯波亦都為畫展加分唔少。畫展結束之後，張大千想去拜訪畢加索，但佢嘅朋友都勸佢唔好，費事摸門釘，張大千偏唔聽勸，帶埋徐雯波同翻譯一齊去「闖門」。出名脾氣古怪嘅畢加索，居然熱情咁接待佢哋，大談藝術，仲互相贈畫添。據聞，畢加索仲有向張大千請教，拎出自己嘅水墨畫叫張大千指點。張大千之後接受採訪嗰陣更表示，畢加索肯熱情招待佢，都係沾咗太太嘅光。

圖為張大千夫婦同畢加索合照，原圖嚟自網絡。