二戰期間，雖然日本天皇裕仁响1945年8月15日廣播《停戰詔書》，表示接受《波茨坦公告》、無條件投降，不過正式嘅投降儀式係去到9月2日先至舉行。當日，日本外相重光葵、陸軍參謀長梅津美治郎等11人登上停泊於日本東京灣嘅美國軍艦「密蘇里號」，出席日本無條件投降簽字儀式。重光葵代表天皇同日本政府，以及梅津美治郎代表日本帝國大本營，率先喺投降書上簽字。之後盟國最高司令麥克阿瑟，以及9國代表先後簽字，接受日本投降。但當時決定喺「密蘇里號」舉行儀式，原來仲有段故㗎！

話說日本喺8月15日宣布投降之後，美國總統杜魯門就授權本身係陸軍上將嘅麥克阿瑟負責安排呢個受降儀式，點知搞到美國太平洋艦隊司令、海軍上將尼米兹好不滿。呢個時候海軍部長福雷斯特爾就提出一個主意，由麥克阿瑟主持儀式，並以盟國最高司令身份簽字，而尼米兹就代表美國簽字，受降儀式响「密蘇里號」舉行，咁就兩邊俾足面，而杜魯門亦都同意呢個做法，所以日本投降書上面最後就出現咗呢2位美國將軍嘅大名喇。至於「密蘇里號」，响1999年就被改造成紀念館，停泊喺珍珠港，紀念第二次世界大戰結束。

圖片為尼米茲簽署日本投降書，取自網絡。