《笑傲江湖》影視作品加埋拍過n次，周潤發、許冠傑、李連杰、任賢齊等明星都飾演過金庸筆下嘅令狐沖。電視劇方面，阿史對於呂頌賢版本印象最深刻，不過靚女同事就中意任賢齊，至於小鮮肉同事，就大讚東方不敗主線嘅陳喬恩版本，就口味而言完全演繹緊咩叫年齡差距。

先同大家重溫1996年嘅呂頌賢版本。點解最中意？無他嘅，選角一流。由梁藝齡飾演任盈盈、陳少霞飾演岳靈珊，仲有羅樂林、陳鴻烈同劉江等好戲之人助陣，分別飾演任我行、左冷禪同向問天幾個大家耳熟能詳嘅角色。講到「我最喜愛角色」，不得不提被譽為最美小師妹、由何美鈿飾演儀琳，嗰種我見猶憐，簡直一絕。選角好、套戲正，「金牌監製」李添勝功不可沒。

去到2013年陳喬恩版嚟個大顛覆，入面嘅令狐沖係霍建華飾演，不過東方不敗由男變女兼同令狐沖相愛、儀琳居然變咗做東方不敗個妹等，搞到陳喬恩好似超越任盈盈成為女主角，劇情令唔少金庸迷O曬嘴。金庸對翻拍自己作品嘅戲劇要求相當高，亦都唔中意太大改動，不過佢就對陳喬恩版本給予肯定，而且陳喬恩演出前，仲特登向金庸取經。其實陳喬恩同金庸係忘年之交，話說金庸老婆即係查太原來好中意睇陳喬恩做戲，之後互相認識，據講陳喬恩之前去親香港，都會去拜訪金庸夫婦添。

其實《笑傲江湖》邊個版本好，真係各花入各眼。最後留返條小問題過大家：記唔記得呂頌賢版嘅東方不敗係邊位演員飾演呢？最好有圖有真相呀~

圖片嚟自網絡。