和平，其實得來不易。話說1914年爆發第一次世界大戰後，以德國、奧匈帝國為首嘅同盟國同埋以英、法、俄為首嘅協約國，動員近六千五百萬名軍人參戰，成為二十世紀初最慘烈嘅戰爭。喺1918年嘅9月底開始，德國嘅盟友包括保加利亞、鄂圖曼帝國同埋奧匈帝國先後向協約國投降，而負隅頑抗嘅德國亦都喺11月11日投降，標誌著第一次世界大戰結束。

話說喺一戰結束之前，德國不斷傳嚟戰事失利消息，內部開始出現矛盾。喺1918年9月，元帥興登堡喺德國議會提出結束戰事，但德軍嘅最高統帥部死心不息，希望用剩餘嘅海軍力量同英軍決一死戰，不過班士兵唔想送死，結果喺基維港發生譁變，浪潮蔓延全國。喺11月9日，德國首都柏林爆發革命，德皇威廉二世宣布退位，其後逃到荷蘭。最終德國就喺11月11日求和，同協約國代表於巴黎市郊嘅火車車廂入面簽訂《康邊停戰協定》。四年戰火導致超過三千萬人死傷，造成嚴重經濟損失。

大戰結束之後，協約國於召開巴黎和會，討論戰後問題，最後於1919年6月28日喺巴黎凡爾賽宮簽署《凡爾賽條約》，迫使德國承認發動戰爭嘅所有責任，又要德國割讓領土及支付鉅額賠償。太過苛刻嘅《凡爾賽條約》，被指係日後德國發動第二次世界大戰嘅原因之一。

圖為《康邊停戰協定》簽署。網絡圖片