早排約咗朋友出尖沙咀食飯，經過美麗華酒店嗰頭，位朋友就指住個「金巴利道」嘅牌問阿史呢條街點解叫呢個名？阿史搵返啲資料，發現原嚟金巴利係一位英國伯爵，佢曾經出任過殖民地大臣，有份參與改善香港嘅基建措施，金巴利道、金巴利街就係以佢個名嚟命名嘅。

話說响19世紀末，由於香港華人嘅住宅區不斷擴展，開始逼近駐港軍人嘅軍營，加上華人住宅區缺乏衛生設備，長此下去好有機會爆發瘟疫，甚至影響英國士兵嘅健康。所以，當1880年金巴利伯爵上任無幾耐，倫敦陸軍醫官就要佢正視香港嘅衛生情況，改善華人住宅區嘅基建措施。

當時華人住宅嘅擴張由港英政府控制，而區內好多衛生問題都係源於欠缺基本設施所致，所以金巴利就派出工程師全面研究全港嘅基建系統，結果發現市內排水系統不足，食水供應亦唔夠，同時缺乏公廁同公共浴室，樓宇建築又唔合規格等一系列問題。工程師隨後建議將鄰近華人住宅區嘅軍營搬去尖沙咀，等政府可以有更多空間喺華人住宅區附近建設衛生設施。香港隨後成立潔淨局、興建下水道等，呢啲項目都喺金巴利在任期間展開，所以政府後嚟開發尖沙咀嗰陣，就以金巴利嘅名嚟命名其中一條街道，紀念佢嘅貢獻。

原圖嚟自網絡。