阿史之前同朋友喺旺角油麻地嗰頭食完飯，就去咗新填地街嘅巴士站搭車返屋企，今次就介紹吓新填地街嘅歷史喇！一睇條街個名「新填地街（Reclamation Street）」，相信都估到呢條街嘅歷史係同填海有關，但原來呢條街以前有另一個中文名，叫「懲戒街」。

話說新填地區呢一帶原本係個淺灘嚟，喺1880年代政府就將一啲被判「苦工監」嘅犯人送嚟呢度做苦工，將淺灘填高變成陸地，並修築成街道，於是呢條街就被稱之為「懲戒街」，意思係由受懲戒嘅犯人修築而成嘅街道。

之不過當時啲居民唔係好鍾意呢個名，自然唔會嗌條街做「懲戒街」，所以佢哋就叫條街做「新填地街」，象徵條街係由淺灘填平而成。後來到咗1910年，政府整理九龍街道嘅時候，亦將條街正式改稱「新填地街」。

圖為新填地街，取自網絡。