電視劇《牛下女高音》因為某位女演員而備受大眾關注，其實套劇仲有好多資深演員參演，好似鍾景輝、蔣志光、KC歐瑞偉等。套劇係以牛頭角下邨一間小學作為背景，講述多年前小學合唱團贏得音樂比賽冠軍，多年之後成員已經成為中年人，各自為生活變得營營役役，由鍾景輝飾演嘅校長逐一搵返大家，重組合唱團追夢。對於牛下，大家可能比較熟悉「牛下女車神」李慧詩，其實牛下仲係首批設有升降機嘅徙置屋邨，可以話係房屋發展史嘅見證。

牛頭角下邨係60年代興建嘅徙置屋邨，亦係香港市區最後一個重建嘅徙置區。其實成為牛頭角徙置區之前，嗰度係牛頭角村，後嚟房委會於1973年成立，附近嘅牛頭角政府廉租屋就改名做牛頭角上邨，牛頭角徙置區就改做牛頭角下邨，按座數劃分為一區同二區，當中二區部分大廈，即係第八到十二座更加係首次使用預製件興建嘅徙置大廈添。

望返房屋署資料，當年牛下嘅大廈樓高16層，升降機可以去到第八同第十三層。每座都有條長長嘅走廊，單位分佈兩邊，居民互相幫助同關懷，鄰里感情好深。邨內有多間中學、小學，又有好多唔同類型嘅商鋪，可以話係一應俱全，就算唔係住喺邨入面，附近居民都會幫襯呢啲商鋪或者細個喺邨內學校讀過書。不過牛頭角下邨响2003年開始陸續清拆，建成新式嘅屋邨，以及起緊嘅東九文化中心。

原圖取自網絡。