記得細個喺尖沙咀行經緬甸臺嘅時候，都自不然會諗呢度叫得做「緬甸臺」，唔通以前好多緬甸人喺度生活？後來留意到緬甸臺英文係Minden Row，先知同緬甸（Myanmar/Burma）呢個國家無關嘅。其實緬甸臺嘅Minden呢個名，係源於德國中部一個城市Minden，真係估佢唔到！

話說喺1880年代開始，當時有好多外國人都喺尖沙咀一帶興建別墅居住，其中有幾位來自Minden嘅德國人嚟到緬甸臺一帶嘅別墅聚居，於是嗰度就被稱為Minden Row喇。翻譯員見到個英文名，就譯咗做緬甸臺，結果引嚟唔少誤會，令人以為同緬甸呢個國家有關。到咗1914年，第一次世界大戰爆發，英德兩國開戰，班德國人嘅房產被政府沒收，並且成為俘虜，從此緬甸臺就再無德國人居住喇。

後來緬甸臺嗰邊開發多一條橫街叫做Minden Avenue，翻譯員發現之前將Minden譯為「緬甸」唔恰當，於是將Minden Avenue譯做「棉登徑」喇。

原圖取自網絡。