近日格魯吉亞爆發反政府示威，示威者要求提前大選。而早於2003年11月，格魯吉亞就曾爆發「玫瑰革命」，成功迫使當時嘅總統謝瓦爾德納澤下台。話說當時謝瓦爾德納澤嘅盟友喺議會大選中勝出，但反對派領袖薩卡什維利指大選結果與民調不符，指控謝瓦爾德納澤操縱選舉，引發幾十萬名民眾上街集會抗議。喺2003年11月21日，薩卡什維利手持玫瑰帶領幾千名民眾衝入議會，呢場運動因此稱之為「玫瑰革命」。

同年11月23日，謝瓦爾德納澤被迫下台，翌年薩卡什維利當選總統，呢場「玫瑰革命」亦成為顏色革命嘅開端，烏克蘭同吉爾吉斯之後亦相繼爆發「橙色革命」同「鬱金香革命」。薩卡什維利上台之後，推行經濟改革，積極發展同西方國家尤其是美國嘅關係，但因為薩卡什維利嘅經濟改革忽略窮人利益，再加上變得越來越專制，到咗2007年秋天，有幾十萬人上街要求呢位「玫瑰革命」領袖辭職。最終响2013年，薩卡什維利完成兩屆任期之後，喺一片指罵聲中落台，其後格魯吉亞當局指控佢非法驅逐反對派、沒收反對派電視台資產等罪名。

原圖取自網絡。