早排《金宵大廈》hit爆全城，據聞劇中嘅金宵大廈係以尖沙咀嘅香檳大廈作為拍攝藍本，劇裡面嘅管理處、舞廳等主要場景，都取材自香檳大廈。講到舞廳，唔係講笑，當年香檳大廈內真係有間叫做瓊宮酒樓夜總會嘅舞廳，仲要係高檔消費場所，男士要著西裝，女士就要著旗袍先入得，認真架勢。不過，曾經嘅夜總會鋪位經多次易手，宜家已經變成足浴店，再不復當年舞廳嘅風光。

香檳大廈喺1957年落成，屬當時甲級商住大廈，曾經係當年九龍一帶最高嘅建築物同地標；大廈地下嘅商舖賣名錶同相機等高檔貨，年中吸引唔少名人、明星去光顧㗎，近年仲成為唔少遊客慕名打卡嘅熱點。而喺上世紀90年代中後期，香檳大廈嘅部分單位被改成劏房，經營一樓一鳳嘅色情生意，治安變得愈來愈差。不過，自從早兩年警方喺香檳大廈大規模掃黃之後，大廈嘅「一樓一鳳」已經全部遷走。

圖為香檳大廈同《金宵大廈》劇照，原圖嚟自網絡。